Tá Coimisiún na Meán ag tabhairt faoi athbhreithniú ar a Straitéis um Sheirbhísí Craolacháin (‘BSS’) faoi láthair. Tacóidh an t-athbhreithniú seo le Toradh Straitéiseach na heagraíochta a bhaint amach chun “tírdhreach meán atá inbhuanaithe, iolraíoch agus rannpháirteach, agus a léiríonn agus a mhúnlaíonn cé muid féin mar shochaí” a spreagadh agus a fhorbairt.
Príomhghné den obair seo is ea tabhairt faoi ghníomhaíochtaí taighde agus comhairliúcháin, lena n-áirítear anailís chuimsitheach chomhshaoil agus gheilleagrach ar chraoltóireacht na hÉireann sa lá atá inniu ann agus sa todhchaí, chomh maith le taighde lucht féachana. Tabharfaidh torthaí na hanailíse margaidh seo léargas ar éileamh an mhargaidh, ar inmharthanacht, agus ar na deiseanna straitéiseacha chun an tírdhreach raidió a leathnú.
Chun tacú leis an anailís seo, tá aighneachtaí á lorg againn anois ó pháirtithe ar spéis leo seirbhísí craolacháin fuaime tráchtála nó pobail nua (seirbhísí fuaime agus closamhairc) a sholáthar. Táimid oscailte do mholtaí maidir le cineál na seirbhíse/na seirbhísí atá le soláthar, an bonn/na samhlacha ar a bhféadfaí seirbhísí den sórt sin a cheadúnú (e.g. FM, DAB+), agus na réimsí agus an lucht féachana ar a bhfreastalóidh seirbhísí breise den sórt sin.
Measfar aighneachtaí le linn an tionscadail taighde, ina dtabharfar aird ar cháilíocht, raon agus cineál an ábhair atá le soláthar agus, go háirithe, a mhéid a chuirfidh aon seirbhís nua le héagsúlacht na seirbhísí in aon réimse ar leith agus/nó leasanna lucht féachana seirbhíse (lena n-áirítear ábhar nideoige agus speisialaithe).
Tabhair faoi deara le do thoil nach measfar gur iarratas ar chonradh craolacháin í aighneacht spéise i soláthar seirbhíse nua. Tá na haighneachtaí á lorg chun críocha taighde agus faisnéise amháin ag an am seo.
Is é 12:00 meán lae Dé hAoine, 17 Deireadh Fómhair 2025 an dáta deiridh chun togra a chur isteach.
Ba chóir do pháirtithe leasmhara a gcuid doiciméad a chur isteach i bhformáid leictreonach (PDF) le méid comhaid nach mó ná 8MB chuig Coimisiún na Meán.
Ba chóir aighneachtaí spéise a sheoladh trí ríomhphost chuig [email protected]
Nó tríd an bpost, chuig:
Foireann Cheadúnúcháin,
Coimisiún na Meán,
1 Foirgnimh Shíol Bhroin,
Bóthar Shíol Bhroin,
Baile Átha Cliath 4,
D04 NP20.
Cuireann an Coimisiún fáilte roimh chomhfhreagras i nGaeilge.