Cuireann Coimisiún na Meán fáilte roimh cheapadh Sinéad McSweeney mar Choimisinéir Sábháilteachta ar Líne. Is iontach an taithí a thugann Sinéad isteach léi ón earnáil phoiblí agus ón domhan ar líne araon chuig rialtóir meán na hÉireann. Tá gach uile dhuine againn i gCoimisiún na Meán ag tnúth le bheith ag obair le Sinéad chun tírdhreach meán atá rathúil, éagsúil, cruthaitheach, sábháilte agus iontaofa a fhorbairt agus a rialú in Éirinn agus ar fud an hEorpa.
Ina cáil mar Choimisinéir Sábháilteachta ar Líne, beidh Sinéad ag obair i gcomhpháirt leis an gCoimisinéir um Sheirbhísí Digiteacha, John Evans maidir le Creat Sábháilteachta ar Líne na hÉireann a chur chun feidhme. Déanfaidh Sinéad maoirseacht ar obair na Rannóige Beartais, Taighde agus Straitéise, a thugann aghaidh ar raon uileghabhálach na saincheisteanna a bhaineann le sábháilteacht ar líne ar fud thírdhreach na meán. Tugann an Rannóg chéanna faoi thaighde chun bonn eolais a chur faoi fheidhmeanna uile na heagraíochta freisin.
Tá taithí ceannaireachta sinsearaí ag Sinéad san earnáil phoiblí agus phríobháideach araon le breis is 20 bliain. Tar éis di leathscór bliain a chaitheamh ag obair le Twitter, tá tuiscint go smior aici ar an gcaoi a n-oibríonn ardáin ar líne agus ar chineál síorathraitheach na ndúshlán a bhaineann do shábháilteacht daoine ar líne. Chaith sí ocht mbliana i róil ceannaireachta sinsearaí sa Gharda Síochána agus i Seirbhís Póilíneachta Thuaisceart Éireann. Bhí ról aici mar chomhairleoir speisialta sa Roinn Dlí agus Cirt agus in Oifig an Ard-Aighne freisin, agus thosaigh sí a gairmréim amach san earnáil phoiblí mar thras-scríobhaí parlaiminteach i dTithe an Oireachtais. Bhí sí ag obair le Women for Election sa phost is déanaí a bhí aici, ar thionscadal Eorpach go príomha ina scrúdaítear leibhéil foréigin inscnebhunaithe a dhírítear ar pholaiteoirí ar mná iad.