Sheol Coimisiún na Meán feachtas nua ar fud na tíre an tseachtain seo chun aird a tharraingt ar ábhar díobhálach ar líne, ar an gcaoi a bhféadfaí é a thuairisciú, agus ar eolas atá ar fáil anseo ar ár suíomh gréasáin, chun cabhrú leis an bpobal. Tá sé mar aidhm ag an bhfeachtas aird a tharraingt ar na cearta atá ag daoine faoin gCreat Sábháilteachta ar Líne de chuid na hÉireann, go háirithe maidir le cosaint leanaí agus daoine óga, agus déanfar é a rolladh amach ar fud na tíre ar an raidió, sna meáin chlóite agus ar na meáin shóisialta. Tá an Roinn Sláinte ag tacú leis an bhfeachtas seo.
San áireamh san fheachtas beidh sraith gearrfhíseán d’úsáideoirí chun iad a spreagadh le hábhar díobhálach a bhféadfaidís teacht air ar líne a thuairisciú, lena n-áirítear cibearbhulaíocht agus cur chun cinn neamhord itheacháin, féindíobháil, féinmharú, agus dúshláin chontúirteacha. Beidh sé de chuspóir aige freisin cur le tuiscint an phobail ar a thábhachtaí atá sé ardáin a chur ar an eolas faoina leithéid d’ábhar. Tá eolas le fáil ar shuíomh gréasáin Choimisiún na Meán faoin gcaoi a bhféadfaí tuairisciú agus faoin méid a thig leat a dhéanamh mura mbíonn tú sásta leis an bhfreagra a thugann ardán ar an tuairisc sin.
Agus í ag caint ar sheoladh an fheachtais nua, dúirt an Coimisinéir Sábháilteachta ar Líne de chuid Choimisiún na Meán, Niamh Hodnett: “Tá oibleagáidí ar ardáin faoin gCreat Sábháilteachta ar Líne sábháilteacht páistí ar líne a chosaint agus srian a chur le hábhar a chuireann isteach ar a leas fisiciúil, meabhrach nó morálta. Is é an straitéis atá againn díriú ar phríomhréimsí torthaí, lena n-áirítear páistí, sábháilteacht phoiblí agus sláinte phoiblí. Tá áthas orainn dul i gcomhpháirtíocht leis an Roinn Sláinte don fheachtas tábhachtach seo agus ba mhaith liom buíochas a ghabháil leis an Aire Sláinte dá tacaíocht agus suim sna hábhair seo.
“Ba mhaith linn a chur i gcuimhne do dhaoine go bhfuil cearta acu faoinár gCreat Sábháilteachta ar Líne, agus a chur ar a gcumas ábhar díobhálach a thuairisciú. Ní féidir glacadh le hábhar díobhálach ar líne riamh. Mholfaimis do dhuine ar bith a thagann ar ábhar den sórt sin é a thuairisciú, a chéaduair, don ardán ar a bhfeiceann sé/sí é. Féach ar ár suíomh gréasáin, www.cnam.ie/ga, chun eolas a fháil faoin gcaoi a bhféadfaí tuairisciú agus faoin méid a thig leat a dhéanamh mura mbíonn tú sásta leis an bhfreagra a fhaigheann tú.”
Dúirt an tAire Sláinte Jennifer Carroll MacNeill TD: “Cuimsítear ábhar díobhálach, míchuí, nó mídhleathach i roinnt spásanna ar líne. Leis an bhfeachtas seo, a chuireann béim ar a thábhachtaí is atá sé ábhar den chineál seo a thuairisciú, neartófar tuiscint agus cuirfear ar chumas an phobail é a thuairisciú nuair a fheiceann siad é. Is eol dúinn na dúshláin roimh leanaí agus daoine óga agus iad ag dul i ngleic le timpeallachtaí digiteacha, agus foilseoidh mé Tuarascáil Deiridh an Tascfhórsa um Shláinte ar Líne ar ball beag, a bhfuil creat cuimsitheach inti chun aghaidh a thabhairt ar na dúshláin seo.”
Dúirt an tAire Cultúir, Cumarsáide agus Spóirt, Patrick O’Donovan TD: “Is é mo phríomhthosaíocht sinn a choinneáil slán ar líne, go háirithe ár leanaí agus ár ndaoine óga a choinneáil slán ar líne. “Ná fan ciúin má fheiceann tú rud éigin díobhálach, míchuí nó mídhleathach ar líne. Is féidir leat é a thuairisciú don ardán agus tá roghanna agat mura bhfuil tú sásta leis an toradh, tá Coimisiún na Meán anseo chun cabhrú leat agus tacú leat. Is féidir linn cabhrú lena chéile agus lenár leanaí fanacht slán trí úsáid a bhaint as ár nguth agus ár gceart chun tuairisciú.”
Tacóidh moll acmhainní nua ar an suíomh gréasáin leis an bhfeachtas, na treoracha Conas tuairisciú agus Eolas do thuismitheoirí ina measc.