Ceisteanna Coitianta

Coimisiún meán na hÉireann is ea Coimisiún na Meán. Is é an ról atá againn féachaint chuige gurb ann do thírdhreach meán in Éirinn atá bisiúil agus éagsúil ina gcuirtear chun cinn meascán glórtha, tuairimíochta agus foinsí nuachta agus cúrsaí reatha, ina cheann ar thimpeallacht shábháilte ar líne a chinntiú.

Is iad na freagrachtaí atá againn:

• Maoirsiú a dhéanamh ar mhaoiniú na hearnála meán agus tacú le forbairt na hearnála méan trí chéile in Éirinn.
• Maoirsiú a dhéanamh ar rialáil seirbhísí craolacháin agus físe ar éileamh.
• Forbairt a dhéanamh ar agus feidhm a thabhairt do chreat rialála na hÉireann um shábháilteacht ar líne.

Tá Coimisiún na Meán faoi stiúir Chathaoirleach Feidhmiúcháin agus áirítear faoi láthair ann Coimisinéir Sábháilteachta ar Líne, Coimisinéir Forbartha Meán agus Coimisinéir Craolacháin.

Chomh luath agus a bhunaítear na rialacháin agus cóid faoin gcreat nua rialála um shábháilteacht ar líne, déanfaidh Coimisiún na Meán próiseáil ar ghearáin aonair maidir leis na cóid seo. Beidh Coimisiún na Meán freagrach as an Acht um Sheirbhísí Digiteacha a chur i bhfeidhm ach éifeacht a bheith tugtha don reachtaíocht úd faoi dhlí na hÉireann.

Ní dhéanaimid rialáil ar na hábhair seo a leanas:

• Cosaint sonraí.
• Cibearshlándáil.
• Síntiúis le seirbhísí meán.
• Seirbhísí leathanbhanda.
• Oibritheoirí cearrbhachais ar líne.
• Meáin chlóite.
• Cosaint/cearta tomhaltóirí.
• Úsáideoirí deiridh seirbhísí ar líne.

Ní dhéanaimid imscrúdú ar ghearáin aonair maidir le sábháilteacht ar líne faoi láthair.

Foireann coimisinéirí, faoi stiúir cathaoirligh feidhmiúcháin, a reáchtálann Coimisiún na Meán.

Is í an fhoireann Coimisinéirí cinnteoirí deiridh Choimisiún na Meán. Is comhlacht poiblí neamhspleách é Coimisiún na Meán. Is ann do mheicníochtaí cuntasachta éagsúla. Féadfar iarraidh orainn teacht i láthair choistí Oireachtais chun ár gcuid gnóthaí a phlé. Ní mór dúinn ráitis straitéise, cláir oibre bhliantúla agus tuarascálacha bliantúla a chur ar fáil don Aire Turasóireachta, Cultúir, Ealaíon, Gaeltachta, Spóirt agus Meán, agus foilseofar go poiblí iad. Foilseoimid ár gcinntí agus bunús a thabhairt leo, agus féadfar dúshlán ár gcinntí a thabhairt sna cúirteanna. Is é an tArd-Reachtaire Cuntas agus Ciste a dhéanann iniúchadh ar ár Ráitis Airgeadais agus féadfaidh Coiste na gCuntas Poiblí grinnscrúdú a dhéanamh orainn maidir le húsáid ár n-acmhainní.

Coibhéis fostaí lánaimseartha de 40 ball foirne atá ag Coimisiún na Meán faoi láthair. Tá údarás tugtha dúinn 120 ball foirne breise a earcú i rith 2023 ionas go mbeimis in ann ár sainchúram a chomhlíonadh le linn ár dtréimhse tionscnaimh.

Tháinig formhór na foirne reatha chugainn ó Údarás Craolacháin na hÉireann. Tá taithí mhór acu ar rialáil craolacháin agus forbairt na meán a chur chun cinn. Áirítear leis seo ceadúnú seirbhísí craolacháin, cóid a fhorbairt nach mór comhlíonadh a dhéanamh orthu, gearáin maidir le cláir raidió agus teilifíse a phróiseáil agus éagsúlacht agus iolrachas sna meáin a chur chun cinn. Tá foireann ann freisin a bhfuil taithí acu ar rialachas corparáideach, airgeadas, innealtóireacht agus TF. Beidh foireann á hearcú ag Coimisiún na Meán a bhfuil taithí acu ar an gcaoi a bhfeidhmíonn seirbhísí agus ardáin dhigiteacha chomh maith leo siúd a bhfuil taithí acu ar an tionchar a bhíonn ag ábhar dochrach ar úsáideoirí amhail leanaí agus daoine leochaileacha eile.

Beidh ár straitéis oibriúcháin agus ár bplean straitéiseach lucht oibre á bhforbairt againn i rith na bliana seo. Cuirfidh na pleananna seo bonn eolais faoin líon deiridh foirne agus faoin raon scileanna a bheidh riachtanach do Choimisiún na Meán. Féachfar leis an gcéad 120 ball foirne breise a earcú sa tréimhse thosaigh earcaíochta.

Tá Údarás Craolacháin na hÉireann (ÚCÉ) i ndiaidh cúnamh a thabhairt don Roinn Turasóireachta, Cultúir, Ealaíon, Gaeltachta, Spóirt agus Meán maidir le socruithe bunaithe agus oibríochtaithe Choimisiún na Meán.

As seo go ceann roinnt seachtainí, leagfar amach ár bplean oibre don tréimhse thionscnaimh a bheidh i bhfeidhm go dtí Feabhra 2024 (tráth a dtiocfaidh an tAcht um Sheirbhísí Digiteacha in éifeacht, meastar). Sna seachtainí beaga amach romhainn, tabharfaimid an plean chun críche, lena n-áirítear ár gcur chuige i leith acmhainní, ina mbeidh meascán d’iar-bhaill foirne ÚCÉ, earcaithe nua, saineolaithe agus sainchomhairleoirí. Tá sé i gceist againn achoimre den phlean oibre do Bhliain 1 a fhoilsiú nuair atá sé faoi réir.

Déanfaimid monatóireacht ar an gcomhlíonadh a dhéantar le dualgais reachtúla agus féadfaimid smachtbhannaí a fhorchur orthu siúd a mhainníonn ceanglas a chomhlíonadh. Áirítear leis seo smachtbhannaí airgeadais a fhorchur ar sholáthraithe seirbhísí meán closamhairc craolacháin agus ar líne. Féadfar bainisteoirí sinsearacha eintiteas rialaithe a ionchúiseamh i dtaca le cionta áirithe.

Déanfar maoiniú ar chostais reáchtála Choimisiún na Meán, le linn 2023, trí thobhach a ghearradh ar sholáthraithe seirbhísí craolacháin agus trí fhóirdheontas ó chistí Rialtais ar fiú €10.5 milliún é. Amach anseo, gearrfaidh Coimisiún na Meán tobhaigh ar na seirbhísí ar líne agus ar éileamh a ndéanaimid rialáil orthu.

Sciar den táille ceadúnais teilifíse a mhaoiníonn scéimeanna maoinithe Choimisiún na Meán chun tacú le forbairt na hearnála meán, arna bhforlíonadh ag maoiniú Rialtais i leith na scéimeanna. Amach anseo, beidh Coimisiún na Meán in ann tobhach a ghearradh ar sholáthraithe seirbhísí meán closamhairc chun scéim a fhorbairt a thacóidh le saothair Eorpacha a léiriú.

Baineann ár sainchúram le rialáil a dhéanamh ar sheirbhísí craolacháin, soláthraithe ar éileamh, agus ardáin ar líne atá bunaithe in Éirinn i dtaca leis na seirbhísí a gcuireann siad ar fáil in Éirinn agus ar fud na hEorpa.

Déantar rialáil ar sholáthraithe atá bunaithe i mballstáit AE eile sa stát a bhfuil siad bunaithe ann maidir leis na seirbhísí a gcuireann siad ar fáil ar fud na hEorpa, Éire san áireamh.

Tá ról ag an gCoimisiún Eorpach i dtaca le hardáin ollmhóra ar líne agus innill chuardaigh (iad siúd a bhfuil breis agus 45 milliún úsáideoir gníomhach in aghaidh na míosa san AE acu). Tá a lán de na soláthraithe móra seo bunaithe in Éirinn.

Oibreoidh Coimisiún na Meán go dlúth leis an gCoimisiún Eorpach agus lenár gcomheagraíochtaí i mballstáit AE eile le sábháilteacht úsáideoirí in Éirinn agus ar fud na hEorpa a chinntiú.

Forbróimid agus coimeádfaimid clár cuideachtaí a ndéanaimid rialáil orthu agus beidh fáil air ar ár suíomh gréasáin.

Tosaíocht thábhachtach do Choimisiún na Meán is ea forbairt treoirlínte agus cód. Is le treoirlínte agus cóid a dhéantar rialáil ar chaighdeáin agus cleachtais seirbhísí craolacháin, soláthraithe seirbhísí meán closamhairc ar éileamh agus soláthraithe seirbhísí sainainmnithe ar líne trína n-éascaítear ábhar arna ghiniúint ag úsáideoirí.

Forbrófar cóid agus treoirlínte chun tacú le cuspóirí reachtúla amhail cothromaíocht i dtuairisceoireacht nuachta craolta agus cosaint úsáideoirí – leanaí go speisialta – ar ábhar dochrach ar líne.

Forbróidh Coimisiún na Meán cóid agus treoirlínte trí thaighde agus mar thoradh ar chomhairliúchán le saineolaithe ábhartha, ionadaithe tionscail, an tsochaí shibhialta agus an pobal i gcoitinne. Bainfimid úsáid as fóraim, coistí comhairleacha, taighde agus comhairliúchán poiblí nuair is cuí.

Beidh cóid agus treoirlínte fianaisebhunaithe agus cothrom.

Fanfaidh cóid agus rialacháin chraolacháin a d’fhorbair ÚCÉ i bhfeidhm nó go ndéanfaidh Coimisiún na Meán iad a leasú nó a aisghairm.

Dírítear cóid um shábháilteacht ar líne ar chineálacha áirithe ábhair dhochraigh a leagtar amach sa reachtaíocht. Mar shampla: íomhánna príobháideacha a roinntear gan chead, ábhar a ghríosann ciníochas agus cineálacha fuatha eile, ábhar atá dochrach do leanaí, cibearbhulaíocht, agus ábhar a spreagann neamhoird itheacháin, féinmharú agus féindochar.

Féadfaidh cóid um shábháilteacht ar line caighdeáin a leagan amach maidir leis an gcaoi a laghdaíonn soláthraithe rochtain ar ábhar dochrach agus maolú ar na rioscaí a bhíonn i gceist leis. Breithneoimid raon dualgas lena n-áireofaí na modhanna faoina ndéileálann soláthraithe le gearáin maidir le hábhar dochrach, conas a chosnaíonn siad leanaí ar ábhar ar líne is míchuí ó thaobh aoise agus cén dóigh a laghdaíonn siad an líon daoine a nochtar ábhar dochrach dóibh.

Mionaoisigh:

Beidh tús áite á thabhairt againn do mhionaoisigh a chosaint ar ábhar dochrach agus beidh sin le sonrú sna cóid um shábháilteacht ar líne a bheidh ag Coimisiún na Meán.

I gcás go gcuirtear ar an eolas muid maidir le hábhar dochrach féideartha arna thionscnamh ó sheirbhís atá bunaithe i mballstát AE eile, féadfaimid iarraidh ar an rialálaí sa stát úd gníomhú.

Pléitear le hábhar dochrach féideartha arna thionscnamh ó sheirbhís lasmuigh den AE ar bhonn comhordaithe le comheagraíochtaí Eorpacha agus leis an gCoimisiún Eorpach.

Tagann seirbhísí físe ar éileamh atá bunaithe in Éirinn faoi réimeas reachtúil rialála mar thoradh ar an uasdátú atá déanta ar rialáil seirbhísí craolacháin teilifíse agus seirbhísí físe ar éileamh. Amhail seirbhísí craolacháin, beidh soláthraithe na seirbhísí sin faoi réir cheangal na gcód agus na rialachán, lena n-áirítear fógraíocht, inrochtaineacht agus neamhchlaontacht i nuacht agus cúrsaí reatha.

Tá freagracht ar Choimisiún na Meán maidir le rialáil a dhéanamh ar sheirbhísí meán closamhairc ar éileamh atá bunaithe in Éirinn. Forbróimid agus coimeádfaimid clár cuideachtaí a ndéanaimid rialáil orthu agus beidh fáil air ar ár suíomh gréasáin.

Bainfidh ár gcóid um shábháilteacht ar líne le seirbhísí atá bunaithe in Éirinn.

I gcás go gcuirtear ar an eolas muid maidir le hábhar dochrach féideartha arna thionscnamh ó sheirbhís atá bunaithe i mballstát AE eile, féadfaimid iarraidh ar an rialálaí sa stát úd gníomhú.

Pléitear le hábhar dochrach féideartha arna thionscnamh ó sheirbhís lasmuigh den AE ar bhonn comhordaithe le comheagraíochtaí Eorpacha agus leis an gCoimisiún Eorpach.