Rialáil na Fógraíochta Polaitiúla in Éirinn

Faoi dhlíthe AE a raibh éifeacht leo ó Dheireadh Fómhair 2025 (“Rialachán maidir le Trédhearcacht & Spriocdhíriú na Fógraíochta Polaitiúla” nó “TTPA”), éilítear anois go mbeidh gach fógrán polaitiúil (i bhfoirm ar bith) trédhearcach agus so-aitheanta trí lipéadú soiléir a úsáid.

Éilítear chomh maith go gcuirfear faisnéis áirithe a bhaineann le fógrán polaitiúil (lena n-áirítear urraitheoir an fhógráin, an toghchán nó an reifreann lena mbaineann sé, an tsuim a íocadh as agus an úsáid a baineadh as aon teicnící spriocdhírithe) ar fáil go poiblí i bhfógra trédhearcachta. Is ionann urraitheoir fógraíochta polaitiúla agus an duine aonair, grúpa nó eagraíocht a iarrann an fógrán féin.

Baineann TTPA le fógraíocht pholaitiúil ar fud gach cineál meán, lena n-áirítear ardáin ar líne, nuachtáin agus cláir fógraí.

Ár ról féin

Tá Coimisiún na Meán ar cheann de na trí údarás inniúla a ainmnítear in Éirinn chun maoirseacht a dhéanamh ar chomhlíontacht TTPA.

Soláthraithe seirbhíse idirghabhálacha (i.e. ardáin ar líne agus innill chuardaigh,)
Craoltóirí teilifíse agus raidió
Soláthraithe seirbhíse meán closamhairc ar éileamh
Ardáin comhroinnte físeán

a bhfuil a bpríomhfhoras lonnaithe in Éirinn.

I ndáil le craoltóirí teilifíse agus raidió (chomh maith le cineálacha áirithe soláthraithe ar éileamh), tá cosc ar fhógraíocht atá dírithe ar “chuspóir polaitíochta” faoin Acht Craolacháin 2009.

Údaráis inniúla eile

Is é An Coimisiún Toghcháin an pointe náisiúnta teagmhála le haghaidh TTPA in Éirinn. Is é an t-údarás inniúil é le haghaidh gach soláthraí seirbhísí fógraíochta polaitiúla eile nach dtagann faoi shainchúram Choimisiún na Meán chomh maith.

Déanann An Coimisiún um Chosaint Sonraí maoirseacht ar rialacha TTPA maidir leis an úsáid a bhaintear as teicnící spriocdhírithe agus teicnící seachadta fógráin a mbíonn sonraí pearsanta i gceist leo.

Céard is fógraíocht pholaitiúil ann?

Is éard is fógraíocht pholaitiúil ann ná fógrán a bhfuil sé d’aidhm leis tionchar a imirt ar thoradh reifrinn, próiseas reachtach, próiseas rialála, nó toghcháin.

Céard is an Rialachán maidir le Trédhearcacht & Spriocdhíriú na Fógraíochta Polaitiúla ann?

Cuidíonn TTPA lena chinntiú gur féidir leis an bpobal roghanna eolasacha a dhéanamh, mar shampla roghanna maidir le reifrinn agus le toghcháin, trína dhéanamh níos fusa ar an bpobal an fhógraíocht pholaitiúil a aithint. Is éard atá i gceist le lipéadú na bhfógrán sin ná an pobal a chur ar an eolas faoin duine, faoin ngrúpa nó faoin eagraíocht atá ag déanamh na fógraíochta féin, agus é a chinntiú go bhfuil siad ar an eolas faoi cé acu is fógrán polaitiúil spriocdhírithe é an fógrán a fuair siad, nó nach ea.

Ní rialaíonn an méid sin ábhar an fhógráin féin.

Cén tionchar a bheidh ag TTPA ar an bhfógraíocht pholaitiúil?

Éilíonn TTPA go mbeidh gach fógrán polaitiúil lipéadaithe go soiléir agus go mbeidh ábhar dá leithéid seo a leanas san áireamh ar an lipéad:
• Ráiteas gur fógrán polaitiúil atá ann
• Ainm urraitheoir an fhógráin, i.e. an duine a iarrann an fógrán
• An toghchán nó an reifreann lena mbaineann an fógrán
• De réir mar is infheidhme, ráiteas maidir le cé acu a úsáideadh nó nár úsáideadh teicnící spriocdhírithe nó teicnící seachadta fógráin
• Fógra trédhearcachta nó nasc chuig fógra trédhearcachta.

San fhógra trédhearcachta, ní mór go mbeidh faisnéis áirithe a shonraítear in Airteagal 12 de TTPA, lena n-áirítear, mar shampla:
• Ainm agus sonraí teagmhála an urraitheora
• An tréimhse ina bhfuil sé beartaithe an fógrán a fhoilsiú
• •Méideanna / luach comhiomlánaithe na sochar eile a fhaigheann soláthraithe na seirbhísí fógraíochta polaitiúla, lena n-áirítear iad siúd a fhaigheann an foilsitheoir mar pháirtmhalairt nó mar mhalairt iomlán ar an tseirbhís fógraíochta polaitiúla
chomh maith le faisnéis eile a shonraítear in Airteagal 12 de TTPA.

Cé air a ndéanaimid rialáil faoi TTPA?

Comhfhreagraíonn ár sainchúram rialála faoi TTPA do na heintitis ar a ndéanaimid rialáil faoi láthair. Áirítear leo siúd ardáin ar líne (na meáin shóisialta agus innill chuardaigh ina measc), meáin chraolta agus meáin ar éileamh.

Tá an Coimisiún Toghcháin freagrach as rialáil a dhéanamh ar aon chúsaí a thagann faoi TTPA agus nach dtagann faoi scóip shainchúram Choimisiún na Meán nó an Choimisiúin um Chosaint Sonraí, lena n-áirítear nuachtáin, póstaeir, bileoigíní, bileoga eolais agus spásanna poiblí (e.g. cláir fógraí, scáthláin bus agus bratacha).

Más údar imní duit teicnící seachadta fógráin nó trédhearcacht na dteicnící seachadta fógráin, déan teagmháil leis an gCoimisiún um Chosaint Sonraí.

Faisnéis bhreise

Tá leathanach tiomnaithe ag an gCoimisiún Eorpach maidir le TTPA.

Déan teagmháil linn

Má bhíonn aon cheist agat, déan teagmháil linn.

Ríomhphost: [email protected]
Fón: +353 1 963 7755
Comhlánaigh an fhoirm ghréasáin le haghaidh ceisteanna ginearálta

Rialáil na Fógraíochta Polaitiúla in Éirinn

Ár ról féin

Údaráis inniúla eile

Faisnéis bhreise

Déan teagmháil linn

Sa chuid seo: