An Cód Cothroime, Oibiachtúlachta agus Neamhchlaontachta

Ba cheart do chraoltóirí a thabhairt faoi deara, i gcás faisnéis ar cosúil gur eisíodh í d’aon turas – is é sin, de bhua chineál na faisnéise nó na bhfíricí lena mbaineann an fhaisnéis, go bhféadfaí, le réasún, í a eisiúint níos túisce – ionas go rachaidh sí isteach san fhearann poiblí nó go gcuirfear faoi bhráid an chraoltóra í le linn Thréimhse Chriticiúil an Toghcháin agus an Reifrinn, gur cheart, de ghnáth, déileáil léi mar fhaisnéis atá beartaithe chun mearbhall a chur ar vótálaithe nó chun iad a chur ar míthreoir, nó ar dócha go ndéanfaí amhlaidh léi, agus mar sin ba cheart feidhm a bheith ag an treoir maidir le cúram breise a ghlacadh.

I gcás an eolais sin a bhfuil trácht déanta air anseo d’fhéadfadh míreanna a bheith ann a bhfuil spéis nó leas dáiríre ag an bpobal iontu agus atá tábhachtach dóibh; mar sin féin, ní mór do na meáin an cineál sin eolais a láimhseáil le han-chúram i gcás ina bhfuiltear in ann teacht ar thátail dá bharr a d’fhéadfadh duine a chur ar míthreoir nó amú. Is amhlaidh atá go háirithe ós rud é go dtagann feachtais toghcháin nó reifrinn i dtreis de réir mar a dhruidtear le lá na vótála.

Ba cheart do chraoltóirí a bheith ar an eolas go bhféadfadh faisnéis a bheith míthreorach nó mearbhlach, fiú má tá sí fíor de réir na bhfíricí ach gur deacair a tábhacht, a cruinneas nó a comhthéacs a shuí le linn Thréimhse Chriticiúil an Toghcháin agus an Reifrinn.